កម្លាំងនគរបាលប៉ុស្តិ៍បឹងសាឡាង ឃាត់ខ្លួនជនសង្ស័យម្នាក់ ករណីលួចមានស្ថានទម្ងន់ទោស ដោយប្រើអំពើហិង្សា
08-January-2019 | ដោយ ពលមនសិការ
ភ្នំពេញ៖ កម្លាំងនគរបាលប៉ុស្តិ៍បឹងសាឡាង នៃអធិការដ្ឋាននគរបាលខណ្ឌទួលគោក បានឃាត់ខ្លួនជនសង្ស័យម្នាក់ ករណីលួចមានស្ថានទម្ងន់ទោស ដោយប្រើអំពើហិង្សា (ឆក់កាបូបស្ពាយបណ្ដាលឲ្យជនរងគ្រោះដួលរបួសថ្លើមដៃទាំងសងខាង និងក្បាលជង្គង់ទាំងសងខាង) នៅថ្ងៃទី០៨ ខែមករា ឆ្នាំ២០១៩ វេលាម៉ោងប្រហែល ២និង៣០នាទីរំលងអាធ្រាត្រ នៅចំណុចមុខផ្ទះលេខ២៣៣ ផ្លូវមុនីរ៉េត ក្រុមទី៥២ ភូមិ១៧ សង្កាត់បឹងសាឡាង ខណ្ឌទួលគោក រាជធានីភ្នំពេញ។
លោកវរសេនីយ៍ទោ សុខ ហេង អធិការនគរបាលខណ្ឌទួលគោក បានឱ្យដឹងថាជនសង្ស័យឈ្មោះ ព្រីង តួ ហៅអាតួ ភេទប្រុស អាយុ២៧ឆ្នាំ ជនជាតិខ្មែរ មុខរបរពុំពិតប្រាកដ ស្នាក់នៅផ្ទះភូមិទេពអរជូន ឃុំកោះខែល ស្រុកស្អាង ខេត្តកណ្ដាល។
វត្ថុតាងចាប់យកមាន៖ម៉ូតូមួយគ្រឿងម៉ាក HAMAHA . MX KING MOTUL ពណ៌ខ្មៅ ពាក់ស្លាកលេខ ភ្នំពេញ 1HB-2656 មានលេខតួនិងលេខម៉ាស៊ីនៈ239486 (ជាម៉ូតូរបស់ជនសង្ស័យជិះធ្វើសកម្មភាព)។ ជនសង្ស័យរងរបួស ថ្គាមទាំងសងខាង , ឆ្អឹងដងកំបិតឆ្វេង និងក ត្រូវប្រជាពលរដ្ឋចាប់វាយពេលដេញចាប់ប្រផាប់ប្រភីង)។
ជនរងគ្រោះឈ្មោះ ទូច សុភ័ក្រ ភេទប្រុស អាយុ៣៤ឆ្នាំ ជនជាតិខ្មែរ មុខរបរបុគ្គលិក ខារ៉ាអូខេ អេកូ ស្នាក់នៅផ្ទះលេខ៦៦៨ ផ្លូវលំ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។ សម្ភារៈបាត់បង់មាន៖កាបូបស្ពាយចំនួន០១ ពណ៌សូកូឡា ក្នុងនោះមានគ្រឿងក្រេមម្សៅមួយចំនួន ។
លោកអធិការបន្តថាមុនពេលកើតហេតុ ជនរងគ្រោះឈ្មោះ ទូច សុភ័ក្រ ភេទប្រុស អាយុ៣៤ឆ្នាំ ជនជាតិខ្មែរ បានជិះម៉ូតូម៉ាក Honda Today ពណ៌ក្រហម ពាក់ស្លាកលេខ ភ្នំពេញ 1FS-4845 ជិះតែម្នាក់ឯងចេញពីធ្វើការនៅខារ៉ាអូខេអេកូ ក្នុងគោលបំណងត្រឡប់មកផ្ទះវិញ លុះពេលជនរងគ្រោះមកដល់ចំណុចផ្ទះលេខ២៣៣ ផ្លូវមុនីរ៉េត ក្រុមទី៥២ ភូមិ១៧ សង្កាត់បឹងសាឡាង ខណ្ឌទួលគោក រាជធានីភ្នំពេញ ស្រាប់តែមានជនសង្ស័យចំនួន០២នាក់ ឈ្មោះ ព្រីង តួ ហៅអាតួ ភេទប្រុស អាយុ២៧ឆ្នាំ ជនជាតិខ្មែរ និងបក្ខពួកឈ្មោះ ខ្មៅ ភេទប្រុស អាយុប្រហែល២៦ឆ្នាំ ជនជាតិខ្មែរ បានជិះម៉ូតូមួយគ្រឿងម៉ាក HAMAHA . MX KING MOTUL ពណ៌ខ្មៅ ពាក់ស្លាកលេខ ភ្នំពេញ 1HB-2656 ដោយឈ្មោះ ព្រីង តួ ហៅ តួ ជាអ្នក បើកម៉ូតូ ចំណែកឈ្មោះ ខ្មៅ ជាបក្ខពួកជិះខាងក្រោយជាអ្នកឆក់ ភ្លាមនោះជនសង្ស័យបានជិះមកពីខាងក្រោយខាងស្ដាំដៃជនរងគ្រោះ រួចហើយឈ្មោះ ខ្មៅ ជាអ្នកធ្វើសកម្មភាព ឆក់យកកាបូបស្ពាយជនរងគ្រោះ បណ្ដាលឲ្យម៉ូតូរបស់ជនរងគ្រោះដួលទៅលើផ្លូវ និងរងរបួសថ្លើមដៃទាំងសងខាង និងក្បាលជង្គង់ទាំងសងខាង ចំណែកកាបូបស្ពាយក៏ធ្លាក់ ទៅលើផ្លូវដែរ រីឯជនសង្ស័យឈ្មោះ ព្រីង តួ និងឈ្មោះ ខ្មៅ បានជិះម៉ូតូជ្រុលហួសទៅមុខ ឃើញជនរងគ្រោះដួលម៉ូតូនិងកាបូបធ្លាក់ទៅលើផ្លូវ ជនសង្ស័យឈ្មោះ ព្រីង តួ ក៏បានជិះត្រឡប់មកយកកាបូបរបស់ជនរងគ្រោះវិញ ចំណែកឈ្មោះ ខ្មៅ បានលោតចុះពីលើម៉ូតូគេចខ្លួន ពេលមកដល់កន្លែងកើតហេតុ ជនសង្ស័យឈ្មោះ ព្រីង តួ ក៏បានអោនយកកាបូបរបស់ជនរងគ្រោះ ក៏ត្រូវប្រជាពលរដ្ឋនៅក្បែរនោះដេញចាប់និងវាយបណ្ដាលឲ្យរបួសលើថ្គាមទាំងសងខាង និងឆ្អឹងដងកាំបិតខាងឆ្វេងនិងក ចំណែកកាបូបស្ពាយរបស់ជនរងគ្រោះបានបាត់នៅពេលប្រជាពលរដ្ឋដេញចាប់ប្រផាប់ប្រភីង ភ្លាមនោះក៏ត្រូវបានកម្លាំងសមត្ថកិច្ចនគរបាលប៉ុស្តិ៍រដ្ឋបាលបឹងសាឡាង ជួយអន្តរាគមន៍ឃាត់ខ្លួនជនសង្ស័យឈ្មោះ ព្រីង តួ ហៅ តួ និងចាប់យកវត្ថុតាងម៉ូតូជិះធ្វើសកម្មភាព រួចបញ្ជូនមកកាន់ ទីស្នាក់ការប៉ុស្តិ៍នគរបាលរដ្ឋបាលបឹងសាឡាង ចាត់ការតាមផ្លូវច្បាប់តែម្ដង ចំណែក បក្ខពួកឈ្មោះ ខ្មៅ បានរត់គេចខ្លួនបាត់ទៅ។
បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្ដោះអាសន្ន នៅអធិការដ្ឋាន នគរបាលខណ្ឌទួលគោក ដើម្បីធ្វើការសាកសួរ កសាងសំណុំរឿង និងបញ្ជូនទៅសាលាដំបូងរាជធានី ភ្នំពេញ ចាត់ការតាមផ្លូវច្បាប់៕
ចំនួនអ្នកទស្សនា
- ថ្ងៃនេះ7051
- ម្សិលមិញ11441
- សប្តាហ៍នេះ36881
- ខែនេះ152031
- ឆ្នាំនេះ152031
- សរុប20594487